Soliq va majburiyatlar. Xalq qoʻzgʻolonlari

Qoraqalpoqlar ham Xiva xonligining fuqarolari singari o’sha davrdagi xonlikda mavjud soliqlarni to’lab, majburiyatlarni bajarishgan. Aholidan yer solig’i — solg’ut, ruhoniylar foydasiga — ushr solig’i undirilgan. Urush paytlarida qoraqalpoqlar ham qozon puli solig’ini to’lardi. Chorvachilik bilan shug’ullanuvchi har bir oila chorva mollarining qirqdan bir qismini zakot solig’i tariqasida to’lagan. XIX asrning ikkinchi yarmida aholidan 40 bosh qoramol uchun pul hisobida 9 so’m, 40 bosh qo’y va echki uchun 2 so’m 50 tiyin pul miqdorida zakot olingan.